فلاح المسردي - ياصدري احنك | 2021
ياصدري احنك عن الضيق وتضيق
إلى متى ذا الحزن ياصدري قلي
ياصدري الدنيا حظوظ وتوافيق
وانا من الثنتين ذي ماحصل لي
لو ان حظي مثل حظ المرازيق
ما كان عود بي على طيري ياللي
مانيب شاكي ضيقتي للمخاليق
اخاف احد يدري بكثري وقلي
دام الرجال اسرارهم بالصناديق
مانيب شاكي لو اموت بمحلي
انا رصيدي خوتي للمطاليق
من الجنوب اليا ضواحي حولي
. . . . . .
خوة شرف خوة عهود ومواثيق
ماهي لأجل وقت الرخى والتسلي
ارسى من جبال السروات وطويق
واقرب علي من رمش عيني وظلي
إللي حداهم لا لحقها وهي سيق
تعاطفت وهموم صدره تولي
عقال لكن في اللوازم مطافيق
لا شوشوا صاروا سوات المظلي
. . . . . . .
وانا بعد لا ششت مانشف لي ريق
في سوق قلب الروح سهمي معلي
واسكر على صوت العزاوي والافيق
وان جيت كلي ماتغيرت كلي
خوة رجال ونار ودلال وابريق
وفلة حجاج وخاطر مسفهلي
هذي هي اللي تبعد الحزن والضيق
لا صرت اخاف الله واطيعه واصلي
