عيني وعينه | محمد بن غرمان (2021)

قالوا الناس عاشق ما يذوق المنام

يصبح الصبح عينه ما تذوقه ابد

ما دروا بالمحبة والهوى والغرام

هي دواء الاكتئاب اللي مسبب نكد

والغلا والمودة والحلا والهيام

واجمل ايام عمري والهناء والسعد

فدوة اللي ليا من طل زاح الظلام

وان تبوسم تقاطر من لسانه شهد

والبَرد بالثنايا والجمر ما يلام

كان من زود حره ذاب سبة برد

عيني اللي لعينه يوم قالت سلام

رد في رمش عينٍ في طرفها سهد

نظرةٍ منه تكفي عن كثير الكلام

بسمته الف ميلٍ تِقربه لو بعد

قلبي المغرم الولهان صفق وحام

لا تلومون من هو لا وقف ما قعد

بانيٍ في خفوقي للحبيّب خيام

المعاليق هلّت مع بروق ورعد

سال سيل المشاعر صوبها بانتظام

كل عرقٍ نبض بي قام له واستعد

ترتعد في حضوره كل لحظة مقام

وان تباطى حضوري فدوته لا نشد

شرهة المبسم اللي حدر ذاك اللثام

من يلوم المعذب لا سمعها فقد

يا حبيبٍ غرامه قمة الاحترام

لا تقولون بعد القول ذا وش بعد